Американскиот претприемач Илон Маск, во Берлин изјави дека верува дека за десет години повеќето автомобили ќе возат автономно.
„Ќе стане сè поретко некој сам да го вози својот автомобил“, рече основачот на автомобилскиот концерн „Тесла“, Илон Маск, кој во вторникот беше награден со наградата Аксел Спрингер во Берлин.
Наградата, именувана по основачот на најголемиот германски медиумски концерн кој ги издава весниците како „Билд“ или „Велт“, се доделува по петти пат на луѓе кои покажуваат посебно чувство на инвентивност. Меѓу претходните добитници се основачот на Фејсбук Марк Закерберг, како и сопственикот на платформата Амазон и основач Џеф Безос.
Маск во Берлин рече дека не се противи на соработката со етаблирани производители на автомобили како БМВ или Мерцедес.
„Доколку конкурент дојде во Тесла со предлог за соработка, нема да се спротивставиме“, рече Маск.
Тесла моментално ја гради најголемата фабрика во Европа одма покрај Берлин, која од следната година треба да произведува до половина милион електрични автомобили. Маск неодамна објави дека на истото место треба да се направи фабрика за батерии за електрични автомобили.
Тој исто така најави дека, кога фабриката ќе започне со производство, ќе поминува повеќе време во Германија.
