Раководните лица во Фолксваген им одобрија на своите инженери да започнат со развој на серискиот модел на концептот „Taigun“. Малиот кросовер би требало да се најде во продажните салони во 2016-та година.
Автомобилот, чиј концепт имаше премиера на авто-саемот во Сао Паоло во 2012-та година, е со должина под 4 метри и цели на пазарот на слични модели во сегментот каде конкуренцијата се уште не е толку голема.
„Taigun“ сепак нема да биде вистински теренец со оглед дека засега се предвидува само верзија со погон на предните тркала.
Фолксваген на купувачите најверојатно ќе им понуди верзии со трицилиндрични мотори кои би требало да бидат помоќни од оние кои го придивижуваат моделот „Up!“. Исто така се наведува дека е во план и варијанта со погон на гас.
Се очекува ова возило да се произведува во фабриките на компанијата во Бразил и Индија, а како опција се разгледува и погонот во Русија.
Иако првично беше замислен како модел за пазарите во развој, „Taigun“ ќе биде понуден и на европските купувачи.
