Француската енергетска групација „Total SE“ ќе престане да рафинира нафта во регионот на Париз и ќе инвестира над 500 милиони евра до 2024-та година, заменувајќи го својот капацитет со обновливи горива и биопластика, пренесува „Bloomberg“.
Одлуката на нафтениот гигант ја одразува зголемената побарувачка за позелена енергија, како и посветеноста на „Total“ за намалување на изложеноста на јаглеводородот и ограничувањето на емисијата на јаглерод диоксид од работењето. Компанијата, како и нејзините европски конкуренти, „Royal Dutch Shell Plc“ и „BP Plc“, е под зголемен притисок од акционерите, владите и јавноста да ги засилат мерките за справување со климатските промени.
Рафинирањето на сурова нафта во објектот „Grandpuits“ ќе престане во март и складирањето на јаглеводородите ќе заврши на крајот на 2023-та година, се вели во соопштението на „Total“. До 2024-та година, рафинеријата ќе се фокусира на производство на обновлив дизел, главно за авијацијата, на рециклирање на пластика и производство на биопластика, како и на работа на две соларни централи. Наместо „Grandpuits“, клиентите на компанијата во регионот на Париз ќе бидат снабдувани со нафта од рафинериите на „Total SE“ во Нормандија и Донгес.
„„Total“ ја покажа својата посветеност кон енергетската транзиција и ја потврди својата амбиција да постигне неутралност на јаглеродот во Европа до 2050-та година“, рече Бернард Пинател, претседател на „Total Refining & Chemicals“. Според него, „Grandpuits“ претставува 8% од вкупниот капацитет за рафинирање во Франција.
Рафинериските маргини се под притисок поради пандемијата на коронавирусот, што ја ограничува побарувачката за нафтени деривати како авионско гориво. И обратно, фабриката за биогорива на „Total“ во Ла Меде, во јужна Франција, остана профитабилна за време на кризата, изјави извршниот директор Патрик Пујан во јули.
