Манчестер Јунајтед влегува во наддавањето за Герет Бејл со понуда од рекордни за клубот 60 милиони фунти (69.5 милиони евра), тврдат англиските медиуми.
Шампионите планираат да ја направат ѕвездата на Тотенхем првиот голем трансфер по доаѓањето на новиот менаџер Дејвид Мојс.
Според медиумите почетокот на преговорите меѓу двата клуба е причината за враќањето на потпретседателот на „црвените ѓаволи“ Ед Вудворд од предсезонската турнеја во Азија и Австралија.
Ако клубот постигне договор за Бејл со сума од 60 милиони фунти, ќе го собори сопствениот рекорд за нов играч и тој повторно ќе биде доведен од Тотенхем. Во моментов врв на трансферните достигнувања на „црвените ѓаволи“ е и натаму Димитар Бербатов, кој во септември 2008-та година го смени „Вајт Харт Лејн“ со „Олд Трафорд“ за сума од 30.75 милиони фунти.
Јунајтед не е особено активен на трансфер пазарот, но сега се обидува да го земе и Цеск Фабрегас од Барселона. Различни гласини кружат околу клубот и за враќањето на Кристијано Роналдо со „мегатрансфер“ од Реал Мадрид, кој до неодамна беше најсериозен кандидат за Бејл.
