„Microsoft“ на 15-ти септември објави дека ќе лансира облачна услуга, како „Netflix“, како дел од пакетот со 15-месечна претплата, пренесува „CNBC“.
Минатиот месец компанијата објави дека ќе ја направи својата „xCloud“ стриминг платформа бесплатен додаток на услугата „Xbox Game Pass Ultimate“. Последната, која чини 15 долари месечно, е главен производ за претплата на компанијата и им овозможува на играчите пристап до каталог на игри за конзолата „Xbox One“ и за компјутерите со „Windows 10“.
Бета верзија на софтверот за игри во облак на „Microsoft“ ќе биде вклучена во „Xbox Game Pass“ на 15-ти септември и ќе им овозможи на корисниците да се префрлат на игри за паметни телефони или таблети.
Апликацијата ќе биде достапна за уреди со „Android“ во 22 земји, вклучувајќи ги САД, Канада, Велика Британија и Јужна Кореја. „Microsoft“ соопшти дека ќе биде достапна и за компјутери, но сè уште не објавила датум на кој ќе се случи тоа.
Играчите ќе можат да избираат од селекцијата на над 100 игри на самиот почеток. „Microsoft“ не ги откри сите наслови што ќе ги понуди, но првично сподели список со игри, вклучувајќи ги „Destiny 2“, „Gears on War 5“, „Grounded“, „Halo 5“, „Minecraft Dungeons“ и претстојната „Tell Me Why”.
Можноста да се играат игри во облакот е концепт кој доби интензитет во индустријата за видео игри, вреден 150 милијарди долари.
Технологијата е често опишана како еден вид „Netflix“ за игри и им овозможува на луѓето да проследуваат игри на Интернет преку телефон, таблет или компјутер, додека самите игри се наоѓаат на посебни сервери. Атрактивноста на овој модел е во тоа што луѓето не треба да купуваат конзоли или скапи компјутери за да играат.
Сепак, конкуренцијата во оваа област расте. Минатата година „Google“ лансираше своја платформа за стриминг наречена „Stadia“. Тоа беше примена со мешани реакции поради малиот каталог на игри и фактот дека повеќето наслови мораше да се купат одделно.
Во случајот со „Microsoft“, компанијата првично ќе понуди игри во облак за телефони и таблети со „Android“, но не и за „Apple“ компјутери или уреди.
