Facebook веќе подолго време развива сопствени очила за зголемена реалност (AR). Тие очила, чие кодно име е Orion нема да бидат додаток за телефони, туку би требало во целост да ги заменат.
Според информациите кои се достапни за јавноста, тие би можеле да овозможат остварување на телефонски повици без да се поврзете со телефон, а податоците би се прикажале на мал дисплеј (слично како што тоа го правеше Google Glass). Очилата ќе имаат камера која ќе им овозможи на корисниците во живо да ги пренесуваат настаните на своите пријатели и следбеници.
За таа цел, Facebook направи партнерство со компанијата Luxottica, која произведува очила за големи брендови како што се Ray-Ban, Versace, Vogue, Bvlgari…. Целта е овие очила да се стават во продажба за неколку години, најверојатно во период помеѓу 2023 и 2025 година. Luxottica е директно вклучена во развојот на очилата, но постојат индиции дека покрај Orion, кој ќе се води како Facebook производ, истата технологија ќе биде применета и на нивниот производ, кој има кодно име Stela.
Аналитичарите сметаат дека Ray-Ban, како и другите брендови за очила создадени во производствените капацитети на оваа компанија, ќе биде доволна гаранција дека Orion и Stela очилата нема да ја доживеат судбина на Google Glass.
