Екипата на Далас продолжи да реди неуспеси на гостински терен и вчера загуби кај Бостон (114-93). Селтикси и без својата прва ѕвезда Кајри Ирвинг беа преголем залак за тимот од Тексас. Харисон Барнс со 20 и Лука Дончиќ со 19 поени немаа сили да приредат изненадување во „ТД Гарден“.
Очајната игра на ЛА Лејкерс без Леброн Џејмс продолжи и на вчерашниот дуел против Њујорк Никс (112-119) во „Стејплс Центар“. Како и во многу наврати оваа сезона, младите кошаркари на Лук Волтон испуштија предност во последната четвртина. Овој пораз им донесе пласман надвор од плеј-оф местата на западната конференција.
Пол Џорџ со 37 и Расел Вестбрук со 31 поени беа најзаслужни за новиот триумф на Оклахома Сити. Тандерси минимално го совладаа Портланд (109-111) и продолжија да се искачуваат на табелата. Нападот за израмнување за домашната екипа во последните секунди од мечот го промаши Си-Џеј Мекалум.
Интересен натпревар одиграа Чикаго и Индијана на кој се радуваше гостинската екипа (116-119) со поените на Виктор Оладипо на три секунди до крајот.
Во останатите натпревари, Милвоки ја декласираше Атланта (112-144), Мајами го доби дуелот со Вашингтон (115-109), Минесота славеше гостинска победа кај Орландо (120-103), Јута очекувано го надигра Кливленд (117-91), Бруклин го изненади Мемфис (109-100), а ЛА Клиперс победи против Феникс (121-111).
