Зинедин Зидан го напушта кормилото на Реал Мадрид, Французинот вестите ги соопшти на прес конференција која „Кралевите“ ја закажаа попладнево.
Средбата со новинарите ја отвори претседателот Флорентино Перез кој рече: „Зидан дојде да ме види вчера и ми соопшти неочекувана одлука, па тој треба да ви објасни“.
„Зборував со Перез за да му објаснам што мислам во моментов. Прво, за мене, за екипата и за клубот е малку чуден момент, но важен и добар е за сите. Мислам дека овој тим треба да продолжи да победува, но мислам и дека има потреба од промена, од различен глас, друга методологија и затоа ја донесов оваа одлука. Го сакам овој клуб и претседателот, кој ми даде шанса да играм и да го водам тимот од моите соништа. Меѓутоа, сè се менува и затоа и јас решив да си одам“, вели Зидан.
Како што течеа прашањата од новинарите, Французинот почна да открива дека, на некој начин е заситен и дека не гледа начин како Реал би продолжил да победува и следната сезона под негово водство. Не ја отстрани и можноста да се врати еден ден.
„Како што му кажав и на претседателот, ова може да биде и ситуација ‘ќе се видиме наскоро’, бидејќи Мадрид ми даде сè. Јас и понатаму ќе бидам близок до клубот, но оваа одлука е јасна, иако на многу луѓе може да не им биде. По три години ова е вистинската одлука, ова е моментот за промена и за мене и за играчите. Ако не можам да видам јасно како ќе продолжиме да победуваме и каков го сакам тимот, тогаш е време за промена. Јас освоив три титули во ЛШ едноподруго и сега, едноставно, чувствувам дека не знам како би победиле во следната сезона. А јас сум победник, таков бев и како играч, таков сум и сега. Штом гледам дека не знам како да победам тогаш не ја барам вината во друг, туку во мене и затоа заминувам“, додаде Зидан.
Соопшти дека на играчите веќе им кажал преку порака, а со Серхио Рамос разговарал и лично. Она што е интересно, не сакаше да открие кога точно, во кој момент од сезонава ја донел одлуката.
Зидан во Реал Мадрид пристигна во 2016-та година кога го наследи Рафа Бенитез на клупата на „кралевите“. И за тој период во клубот освои три титули во низа во Лигата на шампиони, една во Ла Лига, една во шпанскиот Супер Куп, две во Супер купот на Европа и две светски клупски првенства.
