Директорот на фудбалскиот клуб Милан, Масимилијано Мирабели, потврдил дека клубот би можел да го продаде талентираниот голман Џанлуиџи Донарума.
Интерес за голманот од неколку европски гиганти постои уште од минатата година, меѓутоа тогаш Милан успеа да го задржи во клубот.
Прашање е дали во клубот сега ќе се обидат да го задржат бидејќи голманот е во немилост на навивачите по катастрофалните грешки на натпреварите со Јувентус во финалето на Купот и Аталанта во првенството.
Италијанските медиуми објавија дека по вчерашниот натпревар во Бергамо (Аталанта-Милан 1:1), навивачите одбиле да го земат дресот на Донарума.
„Мора да го заштитиме Донарума и тоа како клуб ќе го направиме“, рекол Мирабели.
„Ќе видиме што ќе се случи со него, но тоа важи и за другите играчи. Во моментот е дел од клубот и нема лесно да се откажеме од него. Сепак, доколку добиеме добра понуда, секој од нашите играчи може да биде продаден. Постојат многу побогати клубови со кои не можеме да се мериме финансиски. Не смееме да се залажуваме дека можеме да првилечеме големи фудбалски имиња како што тоа го правевме во минатото“, дополнил директорот на Милан.
За Донарума, според италијанските медиуми, заинтересирани биле ПСЖ, Реал Мадрид и Манчестер јунајтед.
