И покрај тоа што „Xiaomi“ во понудата има широк спектар на производи, тоа не значи дека нема место за уште еден – нов лаптоп наменет за љубителите на компјутерските игри „Mi Gaming Laptop“.
Ова не е првиот лаптоп на кинескиот производител, но е првиот наменет за гејминг. Според спецификациите, „Xiaomi“ на почетокот ќе понуди две конфигурации: двете имаат „Intel“ процесори од седмата генерација и 15,6-инчен „FHD“ екран.
Купувачите ќе може да изберат помеѓу процесорите „Core i5“ и „Core i7“, како и меѓу графичките картички „Nvidiа“ – „GTX 1060“ и „GTX 1050 Ti“.
Моделот со помоќен процесор и графичка картичка ќе има 16GB RAM, SSD oд 256GB и HDD oд еден терабајт. Послабиот модел ќе има 8GB RAM, 128 GB SSD и идентитечен HDD.
„Xiaomi“ тврди дека системот за ладење на овие лаптопи е еден од најдобрите на пазарот. „Mi Gaming Laptop“ имаат и посебно копче за т.н. „турбо ладење“. А поради напредниот систем за ладење тежината на „Mi Gaming“ е околу 2,7 килограми.
На тастатурата, која има „RGB“ осветлување на четири различни зони, „Xiaomi“ додаде и пет програмски (macro) тастери.
„Mi Gaming Laptop“ има четири „USB 3.0“ порти (Type-A), две „USB-C“ порти, читач за мемориски картички, „HDMI“ порт и два 3,5-милиметарски аудио порти (зa слушалки и микрофон), како и три отвори за ладење од левата и десната страна на куќиштето.
„Mi Gaming“ на почетокот ќе биде достапен на кинескиот пазар, и тоа од 13-април, по цена од околу 960 и 1.440 долари, во зависност од моделот.
