Сопствениците на Манчестер Сити бараат повеќе фудбалски клубови за да ги купат.
„City Football Group“ во моментов е сопственик на фудбалските клубови Манчестер Сити, Њујорк Сити и Мелбурн Сити. Компанијата, исто така, управува со вкупно над 20 екипи во овие градови.
Организацијата е 87% сопственост на „Abu Dhabi United Group“, а останатиот малцински удел е сопственост на конзорциумот „China Media Capital“.
Компанијата сака да купи повеќе клубови, изјави за „CNBC“, Том Глок, главен комерцијален директор на „City Football Group“.
„Сметам дека е многу веројатно дека ќе купиме уште клубови. Гледаме на бенефициите на голем број места во светот“, вели тој.
Според Глок, Кина е во фокусот поради подобрувањето на состојбата тамошната професионална лига, добрата посетеност на стадионите и очигледната државна поддршка.
„Тоа е прилично воспоставена пракса од гледна точка на девојчињата и момчињата кои ја учат играта играјќи за задоволство“, вели Глок.
„Возрасните пак се учат на тренерски вештини на високо ниво, градат капацитети, се отвораат училишта и сето тоа кулминира со подобрување на настапите на националниот тим“, додава тој.
Стручњакот за продажба додава и дека Јужна Кореја, Јапонија и Индија се земји каде што фудбалот претстои да забележи сериозен раст.