На турнирот од Светската 1 Премиер карате лига, А серија одржан во Салзбург, Австрија, македонските карате репрезентативци, членови на кaрате клубот Макпетрол, остварија забележителни резултати. Овој турнир е квалификациски турнир за остварување на олимписка норма за ОИ Токио 2020 година и на него учествуваа 1560 каратисти од 88 држави.
Сениорската репрезентативка и актуелната европска универзитетска шампионка Сара Радичевска настапи во тежинската категорија -50 кг. Во елиминацискиот дел извојува четири победи. Тоа и овозможи нашата репрезентативка да се бори за бронзениот медал. Во првата репасажна борба беше поуспешна од италијанската репрезентативка Мурабито Николе и ја победи со резултат 5-1, додека во шестата борба се сретна со Санчез Естера од Шпанија и загуби со резултат 0-3. Ова беше доволно да оствари висок пласман, 7-мо место во конкуренција на 84 пријавени натпреварувачки од 88 држави од целиот свет. Со овој резултат Сара Радичевска во голема мерка го подобри и своето место на Светската ранг листа за учество на Олимписките игри во Токио 2020 година.
Висок пласман на 7-мото место оствари и стандардната репрезентативка Симона Заборска (-55 кг), во конкуренција на 115 спортистки од 88 држави. Таа покажа апсолутна доминација во првите три кола, кога извојува убедливи победи со преставничките на Англија, Португалија, и Казахстан. Беше поразено минимално со резултат 0-1, во четвртото коло од хрватската репрезентативка Александра Хасани. Подоцна хрватската репрезентативка влезе во финалето и Симона доби шанса да се бори за бронзениот медал. Во првата борба таа беше подобра од претставничката на Германија, додека во втората борба која беше последна борба за бронзениот медал при резултат 0:0, загуби на судиско изјаснување.
Дополнителни поени и подобрување на својата ранкинг листа оствари и најдобриот млад спортист на Македонија за 2017 година Петар Заборски, тој настапи во сениорска конкуренција и стигна до 4-тото коло во категоријата (-75 кг), во која имаше пријавени рекордни 168 каратисти од 88 држави. Петар најнапред забележи три победи во квалификационите кола и стигна до четвртфиналето каде што загуби одпретставникот на Белорусија со минимален резултат од 0:1.
Исто така, нашите репрезентативки Наташа Стефановска, Ангела Мојсовска, Моника Стефановска и Моника Пендаровска, сите членки на КК Макпетрол, прикажаа добри борби и солидна форма.
Тренерот на Макпетрол Бошко Заборски ни изјави: „Задоволни сме од прикжаните борби и моменталната спортска форма на нашите спортисти. Како клуб сме многу активни и се трудиме да учествуваме на сите натпревари кои ги организира Светската карате федерација (WKF), бидејќи од искуство знаеме дека врвни спортисти се прават со учество на најсилните светски турнири. Успеваме да се носиме рамо до рамо со најсилните светски велесили и со нивните каратисти, а малите нијанси на моментална доминација која ја имаат светските велесили во карате спортот, во иднина ќе ги сведеме на минимум. До сега во континуитет остваривме високи резултатски постигнувања, па така и на овој голем турнир освоивме високи пласмани. Сара Радичевска и Симона Заборска покажаа дека поседуваат големи потенцијали и може да бидат сериозни кандидатки за Олимписките игри, а Петар Заборски покажа дека може да победува и во сениорска конкуренција. Исто така радува и податокот што сите наши спортисти имаат нагорна линија на својата спортска форма,. Сите тие достојно го претставија македонскиот карате спорт и на овој силен натпревар во Салзбург. Се надеваме и оптимисти сме дека во иднина ќе бидеме уште поуспешни. Следната недела сите спортисти ќе настапат и на Светската 1 Премиер карате лига во Холандија, од каде очекуваме исто така добри вести“, заврши Д-р. Бошко Заборски, тренер на Карате клубот „Макпетрол“ и селектор на Македонската универзитетска карате репрезентација.
