Данската пивара „Carlsberg“ објави профит од 2017-та година под очекувањата на аналитичарите погодени од падот на продажбата и големиот отпис на неговиот клучен руски пазар, објави „Ројтерс“.
„Carlsberg“, трета по големина пивара во светот, објави дека продадениот обем на пиво се зголемил на сите пазари во минатата година, освен Русија, каде што обемот се намали за 14%, а уделот на пазарот се намали на 31,9% од 34,6% пред една година.
Русија е главен пазар на „Carlsberg“ за Источна Европа и претставува околу петтина од продажбата на компанијата.
Нето добивката за годината што забележа отпис од 4,8 милијарди круни (797,7 милиони долари) од брендот „Baltika“ во Русија падна на 1,26 милијарди круни (209,85 милиони долари) од 4,49 милијарди долари од пред една година. Предвидувањата на аналитичарите беа за профит од 4,86 милијарди долари.
Руското законодавство кое ја ограничува големината на пластичните шишиња за пиво до максимум од 1,5 литри, како дел од напорите за спречување на злоупотреба на алкохолот, ја намали продажбата на пиво во земјата во минатата година.
„Нашиот обем и удел на пазарот во Русија во голема мера беа погодени од намалувањето на големината на „PET“ шишињата“, велат од „Carlsberg“.
Русија долго време предизвикува проблеми за производителите на пиво поради ограничувањата за продажба и рекламирање и зголемување на акцизите за спречување на употребата на алкохол.
„Carlsberg“ се соочува со тешкотии во Русија откако ја презеде контролата врз најголемиот бренд на пиво „Baltika“ во 2008-ма година, поради построгите регулативи за индустријата и слабата економија.
Компанијата соопшти дека очекува оперативниот профит да се зголеми за 4% до 6% во оваа година, додека препорачува зголемување на исплатите на дивиденда во 2017-та година за 60% на 16 круни по акција.
