Шпекулациите околу евентуален трансфер на Нејмар од ПСЖ во Реал Мадрид продолжуваат. Бразилецот, наводно е расположен да се пресели во најголемиот ривал на Барселона, но има одредени барања за да го направи тоа.
Нејмар дефинитивно е еден од најдобрите фудбалери на планетата и веројатно иден освојувач на „Златната топка“. Летово го направи најскапиот трансфер во историјата откако за 222 милиони евра премина од Барселона во ПСЖ.
На повидок можеби е нов рекорд, бидејќи претседателот на Реал Мадрид, Флорентино Перез не се откажува од намерата да го доведе Нејмар на „Бернабеу“. Бразилецот исто така нема проблем да го облече белиот дрес, а шпекулациите велат дека има одредени услови за да го направи тоа.
Тој сака тимот да направи целосна реконструкција и да си заминат Кристијано Роналдо, Герет Бејл и Карим Бензема. Парите не се проблем, бидејќи „кралевите“ можат да му дадат колку ќе посака, како што тоа е случај во ПСЖ. Нејмар наводно му рекол на Перез да ги доведе Еден Азар и Антоан Гризман да му бидат партнери во нападот на Реал Мадрид.
Доколку ова се оствари Реал Мадрид би минал низ фаза на тотална трансформација во составот, а се поставува и прашањето кој ќе го води тимот од клупата, бидејќи Зинедин Зидан тешко ќе ја преживее оваа сезона.
