Европскиот ракометен шампион Вардар со триумф во Плоцк ја започна одбраната на титулата. Вардар вечерва славеше со 26:22 (13:9).
Избраниците на Раул Гонзалес одиграа коректно прво полувреме, во кое доминираа во одбраната и на противникот му дозволија да постигне само осум голови. Вардар од првиот напад имаше водство, три пати во полувремето имаше предност од три гола, а првиот дел го затвори со серија 4:1, предност од 13:9.
Второто полувреме донесе проблеми во играта на Вардар, чии играчи никако не може да го пробијат голманот Вихари, кој за 12 минути во вториот дел собра неверојатни девет одбрани.
Вардар првиот гол во второто полувреме го постигна по шест минути игра, а до 18.минута само три пати го совладаа Вихари.
Сепак, Висла не успеа да го искористи добриот момент на својот голман, два пати израмни (13:13, 15:15), Штербик со неколку интервенции ја врати стабилноста во играта, а Вардар во 50.минута повторно ја врати максималната предност од четири гола, со што ги уништи надежите на амбициозниот домаќин дека може да стигне до триумф.
Борозан со шест гола беше најефикасен играч на Вардар. „Црвени-црните“, во наредното коло, на 23.септември ќе го пречекаат Нант.
