ЦСКА Москва, Спортинг Лисабон, Ливерпул, АПОЕЛ и Карабаг се последните пет екипи кои изборија пласман во главната фаза во Лигата на шампионите за сезоната 2017/2018. Историски успех оствари Карабаг кој успеа да го елиминира Копенхаген и за прв пат во историјата му обезбеди на Азербејџан место во фазата по групи во елитното натпреварување.
Карабаг во Копенхаген допатува со минимална предност од 1:0 по првиот меч, а во реваншот загуби со 2:1. Голот кој го постигна Ндову во 63.минута, кога израмни на 1:1 го однесе азербејџанскиот шампион во Лигата на шампионите. Претходно Копенхаген водеше со голот на Сантандер во 45.минута, а конечните 2:1 ги постави Павловиќ во 66.минута.
АПОЕЛ по три сезони се враќа меѓу елитата откако успеа да ја елиминира Славија Прага. Овој двомеч го реши првиот натпревар на Кипар кога АПОЕЛ победи 2:0, а во реваншот, во Прага немаше голови.
Ливерпул со две победи над Хофенхајм си обезбеди билет за фазата по групи. „Црвените“ првиот меч на гостински терен го добија со 2:1, а во реваншот по само 28 минути игра имаа предност од 3:0 кога голови постигнаа Емре Џан, Салах и уште еднаш Емре Џан. Потоа Ут намали на 3:1, а во второто полувреме Фирмино постигна гол за Ливерпул, а Вагнер за Хофенхајм за конечни 4:2.
ЦСКА рутински го мина Јанг Бојс, по 1:0 во Швајцарија, московскиот тим на домашен терен победи со 2:0. Стрелци на головите беа Шеников во првото и Дзагоев во второто полувреме.
Спортинг во Букурешт кај ФЦСБ (поранешна Стеауа) отпатува со 0:0, но Португалците во реваншот го декласираа противникот со 5:1. Ова значи дека Македонија во името на Стефан Рисотвски ќе има преставник во Лигата на шампионите.
Думбија, Акуња, Мартинс, Дост и Батаља ги постигнаа головите за Спортинг, а единствен стрелец за романскиот тим беше Марањао.
Извлекувањето на групите за Лигата на шампионите ќе се одржи денес.