Најдобриот светски фудбалер, Кристијано Роналдо, се соочува со драстична казна од страна на Шпанската лига бидејќи по добиениот црвен картон во синоќешниот натпревар во Суперкупот против Барселона го турна главниот судија.
Кристијано Роналдо за неполни две минути доби два жолти картона, што значи дека нема да игра во реваншот против Барселона в среда во Мадрид.
Но, поголем проблем за клубот и за него е суспензијата со која се соочува.
Португалецот постигна гол во 80. минута и славејќи го, го соблече дресот поради што доби жолт картон. Две минути подоцна тој се обиде да изнуди пенал, а судијата Рикардо Бургос де Бенгоечеа, поради симилурање, му покажа уште еден жолт картон и го испрати во соблекувалната.
Кога го доби вториот жолт картон тој го оттурна судијата за што, според правилникот на Шпанската федерација, максимална казна е 12 натпревари.
Според членот 96, казната за поблаго насилство над судијата се санкционира со суспензија од четири до 12 натпревари. Судијата во записникот вака го карактеризирал испадот на Роналдо.
