Американскиот судија ја одбил тужбата на Перо Антиќ против њујоршката полиција поврзана со инцидентот што се случи пред еден ноќен клуб во Њујорк во 2015 година.
Антиќ, кој тогаш беше играч на Атланта Хокс, заедно со соиграчот Табо Сефалоша, беше уапсен во инцидентот во кој со нож беше прободен тогашниот кошаркар на Индијана Пејсерс, Крис Коупленд.
Антиќ и Сефалоша во април минатата година поднесоа тужба против њујоршката полиција. Двајцата наведоа дека за време на апсењето полицијата употребила прекумерна сила.
Антиќ во тужбата бараше обесштетување од 25 милиони долари.
Во судските документи се наведува дека судијата одлучил дека полицаецот не употребил прекумерна сила бидејќи „морал да донесе одлука во тој момент и неговото однесување не било неразбирливо“.
Инаку, Сефалоша, пред нешто повеќе од четири месеци ја доби тужбата, односно тој доби четири милиони долари. Во случајот на Сефалоша судот пресудил во корист на кошаркарот бидејќи тој по апсењето, имал видливи повреди.
Инаку, набргу по инцидентот во Њујорк, Антиќ ја напушти Атланта и се пресели во екипата на Фенербахче.