Младите македонски фудбалери вечерва ќе го одиграат првиот натпревар на Европското првенство во Полска. Противник на избраниците на селекторот Благоја Милевски ќе биде селекцијата на Шпанија.
Македонија е дебитант, а до Полска стигна со брилијантниот настап во квалификацискиот циклус, оставајќи ја зад себе Франција.
„Ние сме меѓу дванаесетте најдобри селекции во Европа и имаме право да бидеме горди на тоа. На ова Европско првенство ќе се обидеме да уживаме во натпреварите. Немаме притисок, но ќе се однесуваме одговорно и посветено. Фудбалерите се добро подготвени и сугурен сум дека ќе го дадат најдоброто од себе“, им изјави на новинарите селекторот Милевски на официјалната прес конференција.
Натпреварот се игра во Гдиња со почеток во 20:45 часот. Претходно во Б групата ќе се сретнат Португалија и Србија.
