Неверојатниот кикс на францускиот голман Уго Љорис го обележа почетокот на шестото коло, во квалификацискиот циклус за пласман на Светското првенство во Русија. Почетокот на колото го обележа и сензационалната победа на Андора во дуелот со Унгарија.
Шведска успеа да ја совлада Франција со 2:1 и по шест кола да се искачи на челната позиција во А групата со 13 бодови, колку што има и Франција.
На стадионот во Солна, каде пред три недели се играше финалето во Лига Европа, голманот на Франција, Љорис, во последните секунди од натпреварот направи неверојатен кикс и буквално и ја подари победата на Шведска. Гол од центарот на игралиштето постигна Тоивонен.
Претходно, Франција водеше од 37.минута со брилијантниот гол на Жиру, а шест минути подоцна по лошата реакција на Менди и Паје израмни Дурмаз.
На другите две средби во А групата Холандија со 5-0 славеше над Луксембург, додека Белорусија ја совлада Бугарија со 2-1.
Во Б групата, репрезентацијата на Португалија гостуваше во Латвија и победи со 3-0. Кристијано Роналдо ја продолжи голгетерската форма од Лигата на шампионите, ги постигна првите два гола, а конечниот резултат го постави Андре Силва.
Сигурна победа со головите на Џака и Шачири забележа Швајцарија на Фраските острови, додека Андора ја шокира Унгарија со 1-0.
Х групата го донесе дербито помеѓу Босна и Херцеговина и Грција кое заврши без голови, а Естонија загуби од Белгија 0-2. Стрелци на головите беа Мертенс во првото и Шадли во второто полувреме.
Кипар очекувано победи кај Гибралтар со 2-1.
