Кошаркарите на Бостон Селтикс изборија пласман во финалето, во Источната конференција во НБА лигата. Бостон во седмиот решавачки натпревар забележа победа над Вашингтон Визардс 115:105.
Бостон, мајстoрката против Вашингтон, ја реши во последните неколку минути, откако претходно неговите играчи испуштија предност од 13 поени. При резултат 101:97, Селтикс со серија 9:3 го решија прашањето на победникот.
Клучни фактори за триумфот на Бостон беа шутот за три поени во второто полувреме (8/11) и настапите на играчите од клупата кои постигнаа 48 поени, наспроти само петте кои ги реализираа резервите на Вашингтон.
Неочекувано, херој на Бостон е Кели Олиник, кој постигна рекордни во кариерата 26 поени. Најефикасен кај победникот беше Ајзеа Томас со 29 поени и 12 асистенции.
На Вашингтон не му помогна ниту брилијантниот Бредли Бил кој мечот го заврши со 38 поени, додека мечот со двоен ефект го завршија Ото Портер јуниор (20 поени, 10 скокови) и Џон Вол (18 поени, 11 асистенции).
Бостон во финалето на Истокот ќе игра против актуелниот првак Кливленд. Првите два меча се играат во Бостон на 18 и 20.мај, а потоа два натпревари ќе се играат на теренот на Кливленд на 22 и 24.мај.
