Македонската ракометна репрезентација го доживеа вториот пораз во квалификациите за настап на ЕП во Хрватска, откако во недела вечер во Рејкјавик беше поразена од Исланд со минимални 30:29 (16:16).
Македонските ракометари во првото полувреме беа подобри и го контролираа резултатот, водејќи со 2:4, 3:5, 6:9 и 7:10. Но, потоа дојде до пад во играта и Исланѓаните направија комплетен пресврт и поведоа со 14:12.
Македонија набрзо се врати во игра и до крајот на полувремето успеа да ја анулира негатива, па двете селекции на одмор заминаа со идентични 16:16.
Во вториот дел Исланд имаше константна предност, која на моменти изнесуваше и 4 гола. Но, Македонија постојано наоѓаше начин да се врати во игра и да биде чекор зад резултатот на Исланд. Така беше и во последната минута во која влеговме со головите на Георгиевски и на Кире Лазаров, но Исланд во последните 15 секунди успеа да ја сочува топката и да дојде до значајна победа.
По овој триумф на Исланд, сите четири селекции во нашата група имаат по четири бода, односно по две домашни победи и по два гостински порази.
Во петтото коло Македонија гостува во Украина, а во последното коло нашата селекција ќе ја нагости Чешка.
