Фудбалерот на Реал Мадрид, Герет Бејл, поради повреда на мускулот ќе отсуствува од терените во наредните 30 дена. Велшанецот се повреди во неделата, на дербито со Барселона (2:3).
Герет Бејл, иако недоволно рехабилитиран, со одлука на тренерот го започна „Ел Класико“, но ја обнови повредата на бутниот мускул и натпреварот го заврши во финишот на првото полувреме.
Информациите од Пиринеите говорат дека Бејл ќе отсуствува најмалку еден месец, што практично значи дека сезоната за него е завршена.
Отсуството на Бејл ќе му создаде дополнителни проблеми на тренерот Зидан, пред полуфиналниот двомеч во Лигата на шампионите со Атлетико и финишот на сезоната, во која „Кралскиот клуб“ со Барселона се бори за титулата.
Сезоната во Шпанија завршува на 21 мај, а Велшанецот би можел да биде подготвен за евентуалното финале во Лигата на шампионите, кое се игра на 3 јуни во Кардиф.
