Кошаркарите на Куманово се пласираа во финалето на БИБЛ лигата откако на домашен терен во реванш полуфиналето го победија тимот на Пеќ со 86:80 (18:25, 19:19, 24:21, 25:15).
Куманово по првиот меч имаше негатива 79:83, а во реваншот патникот во финалето го реши Стефан Живковиќ кој конечните 86:80 ги постави со поените постигнати на три секунди до крајот на мечот.
Гостите од Косово во првиот дел имаа и двоцифрена предност, а на полувремето беше 44:37 за Пеќ. Со подобрата и поефикасна игра во вториот дел кумановчани стигнаа до потребната победа поголема од четири поени.
Најефикасен кај Куманово беше капитенот Марјан Јанески со 21 поен, а имаше и шест скокови, додека Јонел Браун постигна 20 поени. Димитар Караџовски беше на чекор до „дабл-дабл“ со 11 поени и девет скокови.
Во финалето Куманово ќе игра против екипата на Берое од Бугарија, која во полуфиналето беше поуспешна од Теодо од Црна Гора.
