Шестиот пораз на последните осум натпревари кои го запишаа кошаркарите на Кливленд и 60-от трипл дабл во кариерата на Расел Вестбрук, ја обележаа измината ноќ во НБА лигата, во која се одиграа десет натпревари.
Продолжува лошата серија на Кливленд, Вестбрук стигна до 60-тиот трипл дабл (видео)
Кливленд е далеку од вистинската форма, а тоа го покажува и најновиот пораз во првенството, шест на последните осум натпревари. Актуелните шампиони загубија на домашен терен од Сакраменто 112:116.
Натпреварот беше решен во дополнителните пет минути, а Сакраменто до триумфот го предводеа Демаркуз Казинс со 28 поени, 11 скокови и 9 асистенции, односно Дарен Колисон со 23 поени.
На Кливелнд не му помогна одличното издание на Леброн Џејмс кој забележа трипл дабл од 24 поени, 13 скокови и 11 асистенции. На ниво беа и останатите двајца од „големата тројка“ на Кливленд (Кајри Ирвинг 20 поени, Кевин Лав 21 поен), но повторно потфрли остатокот од тимот.
Оклахома победи во Њу Орлеанс 114:105, а Расел Вестбрук го забележа 60-от трипл дабл во кариерата. Рас мечот го заврши со 27 поени, 12 скокови и 10 асистенции и се проби на петтото место на вечната листа, потиснувајќи го легендарниот Лери Бирд на шестото место.
Вицепрвакот Голден Стејт ја запиша 39-та победа во 46-от меч сезонава. Голден Стејт победи во Шарлот 113:103. Кевин Дурент постигна 33, Стеф Кари 28, а Клеј Томпсон 19 поени.
На другите натпревари Бостон го победи Хјустон 120:109, Чикаго загуби од Атланта 114:119, Мајами победи во Бруклин 109:106, Мемфис славеше против Торонто 101:99, Далас го порази Њујорк 103:95, а Портланд триумфираше над ЛА Лејкерс 105:98.