Борусија Дортмунд е подготвена да го пушти својот најдобар фудбалер Пјер-Емерик Обамејанг во некој друг клуб, но не за сума помала од 80 милиони евра.
Извршниот директор на Борусија Ханс-Јоаким Вацке изјавил дека има разбирање за желбата на Обамејанг да ја смени средината и да замине во поголем клуб, најчесто се споменуваат Реал Мадрид и Барселона.
„Не можеме да гарантираме дека фудбалерот ќе остане во Дортмунд до крајот на кариерата. Нашата сила е во тоа што секогаш сме способни да најдеме вистинска замена. Потсетувам Обамејанг беше нашата алтернатива за „пропаста на светот“ кога од Борусија замина Роберт Левандовски. Доколку некој понуди 80 милиони евра би размислиле за неговиот статус. Обамејанг е подготвен да оди во поголем клуб“, рекол Вацке.
Инаку, покрај шпанските великани сериозен интерес за Габонецот покажува и Манчестер Сити, како и минхенски Баерн, иако фудбалерот ги отфрли шпекулациите дека би можел да се пресели во Минхен и да тргне по стапките на Марио Геце, Роберт Левандовски и Матс Хумелс.
Обамејанг сезонава игра во голема форма, иако не успеа да и помогне на својата репрезентација да се пласира во четвртфиналето на Африканскиот Куп. Во сите натпреварувања, вклучувајќи ја и репрезентацијата има постигнато 22 голоа на 25 одиграни натпревари.
