Американскиот технолошки концерн „Google“ ќе ја претстави новата верзија на својата оперативна платформа „Android Wear“ – „Android Wear 2.0“, на 9-ти февруари. Ова го објави обично добро информираниот технолошки блогер „Evleaks“.
Досега „Android Wear“ на „Google“ во голема мера не претставуваше интерес за производителите, бидејќи сите беа во исчекување на нејзината нова поголема верзија, која требаше да се појави прво во септември 2016-та година, а потоа на крајот на минатата година.
Според Еван Блас, „Google“ конечно ќе го претстави софтверот на 9-ти февруари, а тоа значи дека е можно уште тогаш да ги видиме првите паметни часовници со новата верзија на оперативната платформа.
Инаку со месеци се зборува за два модели кои „Google“ подготвува заедно со хардверски партнери. Покрај нив не е исклучено наскоро да бидат претставени и други модели.
Според „ZDnet“, „Android Wear OS“ ќе добие голема надградба, а ќе биде можно преку вградениот „Play Store“ да се превземаат директно апликации на уредите, а на тој начин се елиминира потребата од смартфон. „Google“ ќе додаде виртуелна тастатура, нов „лаунчер“ на апликации и нови можности за „Wi-Fi“ поврзување.
Претходно во текот на годината „Google“ потврди дека „Android Wear 2.0“ ќе ги поддржува „Android Pay“ за „Android“ или „iOS“.
Според „9to5Google“ уредите кои ќе го добијат ажурирањето, се оние од линијата „Moto 360“, „Fossil“, „Sony“, „Asus“ и други.
