Филаделфија ја победи Минесота дури по дополнителните пет минути, со 93:91, иако во третата четвртина имаше позитива од 26 поени. Минесота полека се врати во мечот, а Рики Рубио со тројка избори продолжение.
Последните поени на натпреварот ги постигна Ковингтон, по асистенцијата на Дарио Шариќ, на 1,6 секунди до крајот на продолжението.
Џоел Ембид со 25 поени и Иљасова со 19 ја предводеа Филаделфија, додека кај Минесота се истакнаа Зек Лавин со 28 поени, односно Карл-Ентони Таунс со 23 поени и 15 скокови.
Сакраменто, предводен од Демаркус Казинс (31 поен) и Дарен Колисон (26 поени) го победи Денвер со 120:113. Во тимот на Денвер најефикасни беа европските играчи, Данило Галинари уфрли 24, а Никола Јокиќ 18 поени.
Индијана славеше против Детроит 121:116. Пол Џорџ со 32 поени беше најефикасен кај победникот, додека Детроит го запиша осмиот пораз на последните десет натпревари.
Ајзеа Томас уфрли 31 поен со кои Бостон ја победи Јута 115:104. Јута до овој пораз имаше низа од четири победи.
Феникс по серијата од 12 порази успеа да слави против Мајами 99:91. Претходно Феникс славел над Мајами на 3-ти ноември 2009-та година.
Далас на домашен терен го порази Вашингтон 113:105, додека Сан Антонио во дербито го декласира Торонто 110:82.
