Демаркус Казинс го одигра најдобриот меч во својата НБА кариера со што ја обележа изминатата ноќ во НБА лигата. Покрај Казинс, идивидуално се истакна и Леброн Џејмс, кој му донесе на Кливленд победа во продолжениeто против Милвоки и се искачи на осмото место на вечната листа на најдобрите стрелци. Во дербитона Тексас Сан Антонио ја прекина победничката серија на Хјустон.
Демаркус Казинс за многумина е најдобар центар во НБА лигата, но поради „лудата глава“ не секогаш го покажува високиот потенцијал. Против Портланд, Казинс го предводеше Сакраменто до победата 126:121 со 55 поени (17/28 за два, 5/8 за три) 13 скокови и три блокади.
Мечот сепак го обележа неговата реакција кога во финишот на мечот, при резултат 119:119, тој погоди тројка под фаул, а потоа се сврте и плукна кон клупата на противникот. Поради овој потег судиите го испратија во соблекувалната, а тој лут го искина дресот.
Недолго потоа судиите ја сменија својата одлука и Казинс се врати на теренот и го реализира дополнителното слободно фрлање.
Крај на серијата од десет победи во која се наоѓаше Хјустон стави ривалот од Тексас Сан Антонио. Дени Грин и Пети Милс погодија тројки во финишот со кои Сан Антонио славеше 102:100.
Ленард со 21 поен, односно Олдриџ со 17 поени и 10 скокови ги предводеа Спарси, додека Харден со 31 поен, 10 скокови и 7 асистенции беше најдобар кај Хјустон.
Кливленд во Милвоки, на домашниот тим, му се реваншира за неодамнешниот пораз. Предводени од Леброн Џејмс (34), актуелните шампиони славеа по едно продолжение со 114:108.
Џејмс со учинокот на овој натпревар го мина Мосес Мелоу на листа на најдобри стрелци и сега се наоѓа на осмата позиција на вечната листа.
„Кралот Џејмс“ во досегашната кариера има постигнато 27.412 кошеви, а следен на листата кој се наоѓа пред него е Шекил О’Нил (28.596).
