Црвена ѕвезда го декласира Макаби, Дарушафака го порази Реал, Басконија во неизвесна завршница славеше кај Уникс, Бамберг го победи Ефес, а Олимпијакос славеше во Каунас кај Жалгирис во првите мечеви од 12.коло во Евролигата.
Евролига: Црвена ѕвезда го демолираше Макаби, Реал загуби од Дарушафака
Белградска Црвена ѕвезда го декласира Макаби 83:58 за најубедливата евролигашка победа оваа сезона. Со исклучок на првите пет минути домашните кошаркари доминираа во натпреварот, пред се во одбраната. Црвена ѕвезда во еден момент имаше предност и од 31 поен.
Раритет на овој меч е дека Црвена ѕвезда направи само 12 прекршоци и дека Макаби не изведе ниту едно слободно фрлање.
Симоновиќ со 14 поени предводеше група од петмина играчи на белградскиот тим кои постигнаа двоцифрен број на поени.
Двата тима имаат скор 5/7 по 12 одиграни натпревари.
Значајна победа против десеткуваниот Реал 91:68 забележа Дарушафака. Турскиот тим со серијата 13:0 во финишот на втората и почетокот на последната четвртина ја најави победата. во еден момент Дарушафака имаше предност од 22 поени, а Реал разликата ја намали на 13 со серијата 0:6 во последните 40 секунди.
Блескаше Американецот Вонамејкер со 27 поени, додека Реал во чии редови ги немаше Љуљ, Рендолф и Томпкинс го предводеше ветеранот Рејес со 16 кошеви.
Во еден од најдраматичните натпревари сезонава Уникс загуби од Басконија 91:92. При водство на Уникс 88:87 Ларкин погоди тројка на 10 секунди до крајот, но со иста мерка возврати Ленгфорд за 91:90. Потоа фаулиран беше Шенгелија на нецели две секундо до истекот на времето. Грузиецот беше прецизен за триумф на Басконија.
Ленгфорд со 28 и Колом со 23 кошеви беа најефикасни кај Уникс, додека Басконија ја предводеа Ларкин со 22 и Шенгелија со 19 поени.
Олимпијакос со тимска игра славеше во Каунас кај Жалгирис 88:75, а Бамберг го порази Анадолу Ефес 91:83.