Идниот тренер на Баерн Минхен, Пеп Гвардиола ќе добие скап подарок од раководството на клубот. Медиумите во Германија ја објавија сензационалната вест дека „баварците“ ја купиле ѕвездата на Борусија Дортмунд, Марио Гетце. Германскиот репрезентативец ќе премине на „Алијанц-Арена“ за сума од 37 милиони евра. Раководството на Борусија не можеле да сторат ништо за да го задржат 20-годишниот фудбалер, бидејќи токму толку е износот наведен како ослободувачка клаузула во договорот на Гетце. На сличен начин минатото лето Баерн го „украде“ Хави Мартинес од Атлетик Билбао и покрај незаинтересираноста на „баскијците“ да го продадат играчот од средниот ред. Тогаш првите луѓе на Баерн платија рекордни во историјата на германскиот фудбал 40 милиони евра.
Според некои информации се вели дека Гетце, чиј договор со Борусија истекуваше во 2016-та година веќе има потпишано преддоговор со Баерн. Се очекува младиот фудбалер да добива во Минхен годишна плата од 7 милиони евра, што е за 2 милиони евра повеќе отколку кај „милионерите“.
Веста дојде како „гром од ведро небо“, откако цела пролет во Германија упорно се пишуваше дека Баерн има во план да купи друга од ѕвездите на Борусија, Роберт Левандовски. Самиот Гетце пак беше поврзуван со евентуален трансфер во Манчестер Сити или Арсенал.
