Стефано Пиоли е именуван за нов тренер на Интер, соопшти клубот од Милано. Пиоли го наследи Франк де Бур кој доби отказ пред десет дена.
Стефано Пиоли и Интер договорија соработка до 30.јуни 2018 година. Пиоли има 51 година, како играч настапувал за Парма, Верона, Јувентус и Фиорентина, а тренерската кариера ја започнал во 1999 година.
Започнал како тренер во младинскиот тим на Болоња, а потоа работел самостојно во Парма, Пјаченца, Сасуоло, Киево, Палермо, Болоња и Лацио.
Пиоли изминатите две сезони беше во Лацио и со овој тим оствари 44 победи на 91 натпревар. Во првата сезона на клупата на „небесносините“ го освои третото место во Серија А и играше во финалето на Купот.
Интер во шампионатот се наоѓа на деветтото место на табелата со 17 бодови, 13 помалку од лидерот Јувентус, а во Лига Европа е последен во Групата К.
Пиоли дебито на клупата на Интер ќе го има на 20.ноември во градското дерби против Милан.
