Три атлетски трки се одржа во недела во Парк шумата Гази Баба во чест на Денот на Македонската Револуционерна борба – 23 Октомври на кои имаше над 100 учесници.
„Градот Скопје ја поддржува оваа атлетска трка што се одржува по повод 23 Октомври на која има голем број учесници и се надеваме дека секоја година бројот на учесници ќе се зголемува. Сметам дека ваквите манифестации ќе влијаат врз граѓаните и тие да се занимаат рекреативно или професионално со некој спорт, односно да спортуваат и да се грижат за своето здравје. Се надевам дека и другите општини во иднина ќе организираат вакви спортски настани на нивните територии“, истакна градоначалникот Трајановски.
Трката-полумаратон се трчаше на 21.1 км, втората трка на 5 км, а третата , којашто беше рекреативна трка за жени, на 2 км.
На полимаратонот првото место во женска конкуренција го освои Андријана Поп Арсова, второто Виолета Ивановиќ, а како трета на целта пристигна Марвин Меклен.
Во машка конкуренција најбрзо го истрча полумаратонот Муџахид Муслимовски, втор беше Атанас Анчевски, а трет ја помина целта Игор Стојевиќ.
Медалите на најдобрите им ги доделија градоначалникот на Град Скопје, Коце Трајановски и градоначалникот на Општина Гази Баба, Тони Трајковски.
Оваа атлетска трка е под покровителство на Градот Скопје, Општината Гази Баба, Агенцијата за млади и спорт и во соработка и координација со Атлетската федерација на Македонија, а главен организатор на трката е здружението „23 Октомври“.