Барселона славеше над Фленсбург 28-27 во дерби мечот од третото коло, во А групата, во ракометната Лига на шампиони. Барселона по три кола има максимален учинок, а до победата на жешкиот терен во Фленсбург ја однесе Борко Ристовски кој имаше 19 интервенции.
Барселона има максимален ефект по првите три кола во „групата на смртта“ во Лигата на шампионите. Шпанскиот шампион во првиот меч од третата рунда славеше кај Фленсбург 28-27. Натпреварот мина во знакот на голманите Ристовски и Андерсон кои имаа 40 отсто одбранети удари.
Каталонците од почетокот го контролираа мечот, дополнителна сигурност им внесе Борко Ристовски, кој блескаше на голот.
Два гола предност имаше Барса по првиот дел, во 40-та минута разликата беше четири гола, но Фленсбург успеа да се врати на гол негатива. Но поради техничките грешки не успеа да направи целосен пресврт.
Томас Могесен во последните два напади на Фленсбург направи две грешки. По првата негова грешка Барселона не успеа да отвори контранапад, а потоа Андерсон го одбрани ударот на Лазаров од девет метри.
Последниот напад Фленсбург не успеа да го организира бидејќи Могесен едноставно им ја врачи топката на противничките играчи.
Ристовски ја предводеше Барселона со 19 одбрани, а меѓу стрелците се истакна Ѓалуз со осум голови. Кире Лазаров постигна четири гола, но со лош процент на реализација, тој потроши 12 топки.
Кај Фленсбург Андерсон одбрани 18 удари, а Гландорф постигна шест гола.
