Фудбалерите на Вотфорд забележаа голма победа во рамките на петтото премиерлигашко коло, откако на „Викариџ Роуд“, го совладаа Манчестер Јунајтед со 3-1.
Колумбиецот Зунига ја круниса добрата игра на Вотфорд во текот на целиот меч, бидејќи за само 15-тина минути, колку што мина на теренот, постигна гол и избори пенал.
Вотфорд првиот гол го постигна во 34-та минута, кога Капуе го совлада Де Хеа, по еден час игра израмни Рашфорд, а потоа Зунига во првиот контакт со топката, во 83-та минута ја врати предноста на домаќинот.
Истиот играч беше соборен од Фелаини во шеснаесетникот на Јунајтед во 94-та минута, а Дини го реализираше пеналот.
Јунајтед на Жозе Мурињо го забележа третиот пораз за само осум дена: Манчестер Сити минатата сабота славеше со 2-1 во Премиерлигата, а во четвртокот Феенорд го победи Јунајтед со 1-0 во Лига Европа.
Инаку Вотофорд по пауза од 30 години успеа да слави над Манчестер Јунајтед.
„Три фактори влијаеа врз овој натпревар, а само еден од нив може да биде исправен во наредниот период. Првиот се однесува на нас, на нашите индивидуални и тимски грешки. Тоа е во наши раце. Вториот е судијата, ние не можеме да влијаеме врз грешките кои ги прави. Сите зборуваат за резултатот, а не за комичната ситуаија кога го примивме првиот гол. Третиот фактор е среќата, ние на овој меч ја немавме. Бевме подобар тим, а загубивме. Гомеш фантастично го одбрани ударот со глава на Ибрахимовиќ“, рекол Мурињо, заборавајќи да спомене дека во првиот дел при 0-0, де Хеа имаше слична интервенција при ободот со глава на Дини.
Манчестер Јунајтед серијата од три порази ќе се обиде да ја прекине в среда, кога во Лига купот ќе му гостува на Нотремптон, а во Премиерлигата наредната сабота ќе го пречека шампионот Лестер.