Репрезентацијата на Аргентина води со 1-0 против Велика Британија во полуфиналето на Девис купот. Првиот поен на Аргентинците им го донесе Хуан Мартин Дел Потро, кој во пет сета го победи Енди Мари.
Дел Потро и Мари, во Глазгов одиграа вистински маратон, кој по пет часа и 10 минути му припаднa на Аргентинецот со 6-4, 5-7, 6-7, 6-3, 6-4. Со овој триумф Дел Потро успеа да му се реваншира на Мари за поразот во четири сета, во финалето на Олимписките игри.
„Ова е одлично за нас. Уживав во овој меч. Публиката беше одлична и благодарам што нѐ почитуваше двајцата. Победив, но и понатаму се сеќавам на финалето на ОИ. Важна победа за тимот, имаме желба да се пласираме во финалето. Кога играте против Енди не знаете како ќе се заврши мечот. Тој е опасен играч, голем борец и шампион. Во завршницата одиграв неколку добри форхенди и добро сервирав, тоа беше пресудно“, изјавил по мечот Дел Потро.
Во вториот меч ќе играат Кајл Едмунд и Гвидо Пеља, во сабота е мечот во двојки, а преостанатите сингл мечеви се играат в недела.
Во другото полуфинале резултатот помеѓу Хрватска и Франција е 1-1. Ришар Гаске најпрвин го победи Борна Чориќ со 3-0, а потоа израмни Марин Чилиќ со победата во четири сета над Лука Пуи.
