Македонската кошаркарска репрезентација со пораз ги заврши подготовките за настап во квалификациите, преку кои ќе бара пласман на Европското првенство наредната година. Македонските кошаркари во Марибор загубија од Словенија 82-67.
Добро прво полувреме, по кое Словенците имаа предност од пет поени (43-38), одиграа избраниците на Драган Раца, но во пораз ги однесе лошиот финиш на третата и стартот на последната четвртина.
Македонските играчи во последните три и пол минути од третиот период не постигнаа кош од игра, во тој период реализираа само три слободни фрлања, а во последната четвртина цели четири минути беа без поени.
На крајот Словенците предводени од Препелиќ кој постигна 18 кошеви запишаа убедлива победа. Македонија одново ја предводеа браќата Стојановски, Војдан постигна 14, а Дамјан 12 поени.
Квалификациите за пласман на Евробаскетот во 2017 година Македонија ќе ги започне против Луксембург на 31.август, а противници во групата уште ќе бидат Велика Британија и Унгарија.
