Најдобрата македонска тенисерка Лина Ѓорческа која низ квалификациите ќе се обиде да обезбеди настап на последниот Грен слем турнир во сезоната, УС Опен, го дозна името на противничката во првото коло.
Ѓорческа (222-ра на ВТА листата) во првата рунда од квалификациите на УС Опен ќе игра против моментно 158-та во светот, Американката Кетрин Белис.
Белис има 17 години, важи за исклучително талентирана тенисерка, која пред две години низ квалификациите стигна до главниот турнир на УС Опен, а успеа преку Доминика Цибулкова да се пласира и во второто коло.
Кога ја совлада Цибулкова Белис имаше 15 години и четири месеци со што стана најмладата тенисерка која победила во еден меч на УС Опен.
Зад името на Белис стои и дека таа на 15-годишна возраст е јуниорска светска првенка во тенис.
Мечот Лина Ѓорческа-Кетрин Белис на програмата е в среда, во 17 часот, по македонско време.
