Фудбалерите на Манчестер Сити со убедлива победа го најавија својот настап во фазата по групи во Лигата на шампионите оваа сезона. Сити, во Букурешт, ја декласира Стеауа со 5-0, во првиот меч од плејоф рундата во елитното натпреварување.
Манчестер Сити се прошета низ Букурешт и само формалност го направи реваншот на кој ќе биде домаќин. Агуеро постигна три гола, а по еден Давид Силва и Нолито. Победата на Сити можеше да биде уште поубедлива, но Агуеро во осмата и 20-та минута не реализираше удари од белата точка.
Првиот негов удар го одбрани романскиот голман, а во вториот обид биеше над голот.
Блиску до пласман во фазата по групи е и Борусија Менхенгладбах која во Берн славеше над Јанг Бојс 3-1. Рафаел постигна два гола, а еден Хан за германскиот тим, додека единствениот гол за швајцарскиот тим е дело на Сулејмани.
Копенхаген стекна минимална предност над АПОЕЛ пред реваншот на Кипар. Повремениот српски репрезентативец Павловиќ го постигна единствениот гол.
Без победник завршија мечевите Динамо Загреб-Салцбург и Ајакс-Ростов.
Салцбург водеше во Загреб со голот на Лазаро, но Динамо израмни преку Рог, кој погоди од пенал.
Гостите водеа и во Амстердам, искусниот Нобоа му донесе предност на Ростов, која од пенал ја поништи Класен.
Во среда, во рамките на плејофот во Лигата на шампионите ќе се одиграат мечевите: Селтик-Хапоел, Дундлак-Легија Варшава, Порто-Рома, Лудогорец-Викторија Плзен и Виљареал-Монако.
