Дочекан како рок ѕвезда, логично првото големо интервју во Манчестер новиот менаџер на Сити го даде на Ноел Галагер, фронтменот на Оезис и фанатичен навивач на Сити уште од времето кога клубот беше многу помалку познат пред да го купат богатите шеици.
Интервјуто, иако водено неофицијално и повеќе во форма на разговор меѓу навивач на клубот и новиот тренер, интервјуто со Гвардиола за официјалниот Youtube канал на Манчестер Сити не беше воопшто подлизувачки.
Впрочем, со Галагер тешко и нешто би можело да се стави под контрола. Згора на тоа, и Пеп беше во форма, па во некои моменти двајцата толку се опуштија, што им излета и по некоја пцовка.
Ноел се шегуваше со Пеп затоа што омилен пејач му е Џејмс Блант, за кој Галагер рече „не што не го сакам тој лик, туку и го мразам“, додека Гвардиола го праша дали би го повел на турнеја по биртиите низ Манчестер.
Во интересен разговор Пеп откри дека Тикси Бегиристиан, спортскиот директор на Сити и негов соиграч од Барселона, е причината заради која го презема новиот клуб.
Основното мото за работа ќе му биде „сакам да ги убедам играчите да бидат најдобри“.
Галагер го предупреди дека на фудбалерите и тренерите што доаѓаат од континентот им треба време за адаптација, на што Гвардиола призна дека многумина му рекле дека нема да успее да се адаптира
Рокерот го праша и дали ќе ги користи младите фудбалери од академијата на Сити.
„Барселона навистина ја има најдобрата школа во светот, на пример Педро и Бускетс ги следев и знаев додека беа деца. Тука ќе продолжам со таквото трагање и сите талентирани фудбалери од младиот тим ги водам на подготовки“.
Малку е познато дека Гвардиола бил одбиен од Сити како фудбалер од Стјуарт Пирс.
„Точно, Пирс ме одби кога беше менаџер. Но, беше во право. Дојдов со 33-34 години и како фудбалер бев катастрофа. Сонував да играм во Англија, но бев во таква состојба што Стјуарт беше во право што не ме зема“, рече Пеп.
