Фудбалските рперезентации на Аргентина и Панама со победи стартуваа на 100-то издание на Копа Америка. Во натпреварите од првото коло во Групата Д, Аргентина го победи бранителот на трофејот Чиле (2-1), додека Панама со идентичен резултат славеше над Боливија.
Аргентина, без Лионел Меси, успеа да му се одмазди на Чиле за поразот во финалето минатата година и со головите на Анхел Ди Марија и Евер Банега победи со 2-1.
Головите на натпреварот кој се одигра во Санта Клара беа постигнати во второто полувреме, Ди Марија по асистенцијата на Банега погоди во 51.минута, а по еден час игра овие дваца ги сменија улогите, Ди Марија му асистираше на Банега за 2-0.
Почесниот гол за актуелниот шампион на Копа Америка го постигна Хосе Педро Фунисалидо во 93.минута.
Панама на мечот со Боливија испиша историја, бидејќи стана првиот тим кој добил специјална покана за настап, а Копа Америка ја започнал со победа.
Напаѓачот на Ванкувер, Перес по 11 минути игра и донесе предност на Панама, Боливија израмни во 54.минута со голот на ветеранот Хуан Карлос Арсе, а победа на Панама и донесе Перес со својот втор гол во 87.минута.
Инаку и натпреварите во Групата Д не минаа без гафови од страна на организаторот, откако во понеделникот на Уругвајците им ја пуштија химната на Чиле, во вторникот за време на интонирањето на чилеанската химна паралелно одел и еден од хитовите на музичарот Питбул, додека на големиот екран на вистински начин било поставено знамето на Боливија.
