Кошаркарите на Мајами Хит се на чекор до освојување на третата позиција во Источната конференција во НБА, откако го совладаа Детроит 99:93. Мајами и Атланта имаат скор 48-33, но доколку Мајами слави во последниот меч против Бостон, поради подобриот меѓусебен скор со Атланта ќе го освои третото место.
Мајами во победата над Детроит го предводеа Џо Џонсон (25 поени, 5 асистенции) и Горан Драгиќ (16 поени, 5 асистенции) и Луол Денг (17 поени, 10 скокови).
Сан Антонио, во возбудлив натпревар, по едно продолжение ја совлада Оклахома 102:98. Спарси го израмнија НБА рекордот од 40 победи и само еден пораз на домашен терен.
Каваи Ленард со 26 и Тони Паркер со 20 поени беа најдобри во тимот кој го има вториот најдобар резултат во лигата оваа сезона 68-15. Оклахома на овој натпревар настапи без најдобрите тројца играчи (Дурент, Вестбрук, Ибака). Најефикасни во поразениот тим беа Кантер, Вејтерс, Пејн и Адамс со по 17 поени.
На другите натпревари Клиперси убедливо славеа над десеткуваниот Мемфис 110:84, Торонто, кој е втор на Истокот, ја совлада Филаделфија 122:98, а Индијана го порази Њујорк 102:98.
