Актуелните шампиони во НБА лигата, со многу мака минаа на тешкото гостување во Солт Лејк Сити, откако по едно продолжение славеа над Јута. Голден Стејт ја забележа 68-та сезонска победа. На Истокот, Торонто со триумфот над Атланта стигна до јубилејната 50-та победа, што воедно е и нов рекорд на франшизата.
Голден Стејт успеа да слави против Јута, иако на гостувањето во Солт Лејк Сити мораше да игра и дополнителни пет минути. Мечот во продолжение го однесе Клеј Томпсон кој на 15 секунди до крајот на регуларниот дел погоди тројка за 89:89.
Стеф Кари го предводеше тимот на актуелниот шампион со 31 поен, Томпсон постигна 18, а Херисон Барнс имаше учинок од 15 поени и 11 скокови. Голден Стејт сега има 68 победи и седум порази и уште пет триумфи го делат од поставување на нов рекорд во НБА лигата.
Продолжение се играше и во Лос Анџелес, каде Лајкерси славеа над Мајами 102:100. Решавачките поени во продолжението ги постигна Џулиус Рендл на две секунди до крајот.
Торонто ја совлада Атланта 105:97 и ја забележа јубилејната 50-та победа во сезоната, што воедно значи и рекорд на франшизата. Торонто има скор 50-24 и се наоѓа на втората позиција на Истокот со две победи помалку од лидерот Кливленд.
Демар Дерозан постигна 26 кошеви, а Кајл Лаури имаше учинок од 17 поени и 1 асистенции. Атланта ја предводеше Џеф Тиг со 18 поени.
Резултати: ЛА Лејкерс-Мајами 102:100 (п), Минесота-ЛА Клиперс 79:99, Јута-Голден Стејт 96:103 (п), Сакраменто-Вашингтон 120:111, Торонто-Атланта 105:97, Мемфис-Денвер 105:109, Милвоки-Феникс 105:94, Далас-Њујорк 91:89, Сан Антонио-Њу Орлеанс 100:92.