Фудбалскиот клуб Галатасарај наредната сезона нема да може да се натпреварува во европските купови, откако УЕФА го суспендира поради кршење на финасискиот фер плеј, пренесоа во средата турските медиуми.
Галатасарај оваа сезона ја започна во Лигата на шампионите, каде во група со Атлетико Мадрид, Бенфика и Астана го освои третото место и продолжи со настапите во Лига Европа. Во ова натпреварување Галатасарај беше елиминиран во шеснаесетфиналето од Лацио.
Галатасарај е вториот турски клуб кој од страна на УЕФА е исфрлен од европските купови, претходно во 2011 година, Фенербахче доби тригодишна суспензија поради местење на натпревари во турскиот шампионат.
Галатасарај во моментов се наоѓа на петтото место во првенството на Турција.
