Помалку од една недела пред очекуваниот почеток на продажбата на паметните очила „Wearvue TG-01“, „Toshiba“ се откажа од нив. Причината е стратегијата за заштеда на ресурсите, коментира портпаролот на компанијата.
Очилата беа предвидени за вработени во фабриките, магацините и другите индустриски зони. Идејата беше преку нив да се отсликаат интерактивните упатства за работа со дадени машини, листи со задачи и снабдување и други службени информации. На овој начин рацете на вработените остануваат слободни и не треба да ја прекинуваат работата, за да пребаруваат тоа што им е потребно.
Првичните планови на „Toshiba“ беа очилата да започнат да се доставуваат до 29-ти февруари.
„Бидејќи уредот предизвика голем интерес, вклучувајќи ги и медиумите, до последен момент баравме можност“, коментира портпаролот на компанијата.
На крајот сепак преовладуваше новата стратегија за префокусирање на „Toshiba“ и селективно користење на ресурсите, која била усвоена во декември минатата година.
Поради истата причина е прекината и продажбата и на поскапиот модел на паметната нараквица што треба да ги следи здравствените индикатори на пациенти. Наместо тоа, компанијата сега планира префокусирање на бизнисот со здравствени уреди и технологии.
