Комплетирано е првото коло во Топ 16 фазата, во кошаркарската Евролига. Фенербахче, на Перо Антиќ, славеше над Панатинаикос во Е групата, додека актуелниот европски првак Реал, во последните секунди обезбеди победа над Бамберг, во Ф групата.
Дуелот во Истанбул беше пресметка на учителот (Жељко Обрадовиќ) и ученикот (Александар Ѓорѓевиќ), а победи домашниот тим со 82:75. Почетокот на мечот, кога Фенербахче стекна предност од 14:0 ја трасираше победата на турскиот тим, иако Панатинаикос во финишот на третиот период успеа да стигне до предност (56:58).
Перо Антиќ во последната минута ја постигна клучната тројка со која Фенер стекна двоцифрена предност и ја обезбеди победата. Антиќ мечот го заврши со 12 поени (3/6 за три) и пет скока. Јудох со 16, односно Датоме со 15 поени го предводеа Фенер до победата.
Драматичен меч одиграа Ефес и Црвена ѕвезда, а до победата стигна турскиот тим благодарение на Дарио Шариќ кој постигна поени на три секунди до крајот и го постави конечниот резултат 85:84. Црвена ѕвезда го загуби овој меч иако во 28 минута водеше со 70:55.
Реал славеше над Бамберг со 82:79 балгодарение на Серхио Родригез кој мечот го заврши со 22 поени, три скока и осум асистенции. Родригез ја постигна клучната тројка на мечот на 20 секунди до крајот. Инаку Бабмерг, во Мадрид, имаше константна предност, на моменти и од 14 поени, но не успеа да го издржи притисокот.
Група Е:
Анадолу Ефес-Црвена ѕвезда 85:84
Цедевита-Локомотив 75:89
Фенербахче-Панатинаикос 82:75
Уникаха-Дарушафака 70:62
Група Ф:
Жалгирис-Лаборал Куча 68:89
Реал-Бамберг 82:79
Химки-ЦСКА Москва 91:89
Олимпијакос-Барселона 74:62.