Тренерот на мадридски Реал, Рафаел Бенитез, оцени дека против клубот се води медиумска кампања и дека неговиот тим не игра лошо како што тоа се обидуваат тоа да го претстават медиумите.
„Постои кампања против претседателот, клубот и мене. Онаму каде што можат медиумите критикуваат, а кога немаат простор да го прават тоа, тогаш се служат со манипулации. Тоа сите можат да го видат“, изјавил Бенитез за британските медиуми.
Реал денеска на домашен терен ќе го одигра првенствениот натпревар против Реал Сосиедад, а во тој меч влегува по убедливата победа над Рајо Ваљекано (10:2) во минатото коло.
Интересно, и покрај таа победа, навивачите не се задоволни од начинот на кој игра Реал, а Бенитез особено беше на удар по убедливиот пораз од Барселона (0:4).
„Се преувеличуваат работите, јасно е дека јас имам големо тренерско искуство и знам како да останам фокусиран. Во тимот имам 24 фудбалери, доколку некој не игра тогаш веднаш се креира ситуација дека имам нешто против тој фудбалер. Екипата е многу подобра отколку што тоа луѓето го мислат“, рекол Бенитез потенцирајќи дека има одличен однос со своите фудбалери.
