Потрошените милиони во летниот преоден рок не му овозможија на Манчестер Јунајтед да направи некој позначаен резултат во Лигата на шампионите. Јунајтед гостуваше кај Волфсбург и загуби со 3:2, а покрај германскиот тим од Б групата во осминафиналето оди ПСВ Ајндховен кој славеше со пресврт над ЦСКА (2:1).
Група А
Реал запиша историски резултат, откако со 8:0 славеше над Малме и ја израмни најубедливата победа во историјата на Лигата на шампионите, во 2007 година Ливерпул со 8:0 го совлада Бешикташ, а интересно и на тој меч на клупата на победникот седеше Рафа Бенитез.
Кристијано Роналдо, кој на овој меч постигна четири гола, стана најдобриот стрелец кога е во прашање фазата по групи, тој на шест натпревари постигна 11 голови.
Исто така Роналдо и Бензема се првите двајца играчи од иста екипа кои на едн натпревар постигнале најмалку по три гола.
ПСЖ против Шахтјор забележа рутинска победа со головите на Моура и Ибрахимовиќ.
Од оваа група Реал и ПСЖ одат во нокаут фазата, а Шахтјор ќе игра во Лига Европа.
Група А:
ПСЖ-Шахтјор 2:0
(Лукас Моура 57’, Ибрахимовиќ 86’)
Реал-Малме 8:0
(Бензема 12’ 24’ 74’, Роналдо 39’ 47’ 50’ 59’, Ковачиќ 70’)
Табела: Реал 16, ПСЖ 13, Шахтјор 3, Малме 3
Група Б
Пред почетокот на ова коло три тима имаа реални шанси за пласман во осминафиналето, каде на крајот се пласираа Волфсбург и ПСВ Ајндховен, додека Манчестер Јунајтед ќе мора да се задоволи со Лига Европа.
Јунајтед водеше против Волфсбург, потоа германскиот вицепрвак направи пресврт за 2:1, вистинска драма се случуваше во последните осум минути, најпрвин Гуилавуги со авто гол го израмни резултатот, но само две минути подоцна Налдо со својот гол му ја донесе победата и првото место на Волфсбург.
Драматично беше и на Филипс стадионот во Ајндховен, каде домаќинот и ЦСКА калукираа речиси 75 минути, а потоа рускиот шампион стигна до предност со гол од пенал, но ПСВ со два гола до крајот направи пресврт.
Група Б:
Волфсбург-Манчестер Јунајтед 3:2
(Налдо 13’ Налдо 84’, Виериња 29’-Марсијал 9’, Гуилавуги (аг) 82’ )
ПСВ Ајндховен-ЦСКА 2:1
(Де Јонг 78’, Пропер 85’ – Игнашевич 76’)
Табела: Волсбург 12, ПСВ 10, Ман.Јунајтед 8, ЦСКА 4
Група Ц
Бенфика и Атлетико водеа битка за првата позиција во групата, на крајот победи шпанскиот тим, кој само ја потврди добрата форма и успеа да се реваншира за идентичниот пораз од пред месец и пол.
Галатасарај освои бод против Астана и ќе игра во Лига Европа. Астана, дебитантот во Лигата на шампионите, сезонава остави добар впечаток иако не запиша ниту една победа, на крајот освои четири бода, а загуби на гостувањата во Мадрид и Лисабон.
Група Ц:
Галатасарај-Астана 1:1
(Инан 64’-Твумаси 62’)
Бенфика-Атлетико 1:2
(Митроглу 76’-Саул Нигез 33’, Вието 55’)
Табела: Атлетико 13, Бенфика 10, Галатасарај 5, Астана 4
Група Д
Севилја забележа минимална победа над Јувентус и благодарение на поразот на Борусија ќе продолжи во Лига Европа, каде ја брани титулата освоена минатата сезона.
Борусија, во Манчестер, имаше предност од 43-та се до 80-та минута, а потоа Сити постигна три гола и победи со 4:2 за прво место во групата.
Група Д:
Манчестер Сити-Борусија Менхенгладбах 4:2
(Давид Силва 16’, Стерлинг 80’ 81’, Бони 85’-Корб 19’, Рафаел 43’)
Севилја-Јувентус 1:0
(Љоренте 65’)
Табела: Ман.Сити 12, Јувентус 11, Севилја 6, Борусија 5.