„PC“ револуцијата започна пред точно 30 години, кога „Microsoft“ на 20-ти ноември 1985-та година ја објави првата верзија на „Windows“ оперативниот систем со цел да го надмине тогашниот „MS-DOS“.
20-ти ноември 1985-та е многу значаен датум, затоа што тогаш започна револуцијата која допринесе да го добиеме „Windows“, каков денеска го познаваме и користиме.
Иако „Windows 10“ не изгледа ни приближно како верзијата 1.0, најновиот оперативен систем на „Microsoft“ и натаму има многу оргинални делови, како што се „scroll bar“-овите, „drop-down“ менито, иконите и апликациите, како „Notepad“ и „MS Paint“.
„Windows 1.0“ исто така меѓу првите го поддржуваше користењето на компјутерското глувче.
Првата верзија на оперативниост систем на „Microsoft“ не беше најдобро примена меѓу корисниците, но тогаш започна битката меѓу „Apple“, „IBM“ и „Microsoft“ кој ќе направи подобар компјутер за широката народна маса.
За стартување на првиот „Windows“ биле неопходни два флопи дискови, 256 килобајти меморија и графичка картичка, а доколку сте сакале да стартувате поголем број на програми, тогаш ви требал компјутер со хард диск и 512 килобајти „RAM“ меморија.
30 години подоцна „Windows“доминира на пазарот за компјутери. „Microsoft“ три децени продолжува да го усовршува својот оперативен систем, а денеска нивниот главен фокус е насочен кон преминување на „cloud“ технологијата.
По „Windows 1.0“ следеа верзиите: „Windows 2.03“ (9-ти декември 1987-ма), „Windows 3.0“ (22-ри мај 1990-та), „Windows 95“ (24-ти август 1995-та), „Windows 98“ (25-ти јуни 1998-ма), „Windows 2000“ (17-ти февруари 2000-та), „Windows ME“ (14-ти септември 2000-та), „Windows XP“ (25-ти oктомври 2001-ва), „Windows Vista“ (30-ти јануари 2007-ма), „Windows 7“ (22-ри oктомври 2009-та), „Windows 8“ (26-ти oктомври 2012-та), „Windows 8.1“ (17-ти октомври 2013-та) и „Windows 10“ (29-ти јули 2015-та).
