Додека повеќето производители при обновувањето на своите модели ја зголемуваат нивната моќ, компанијата „Lamborghini“ избра друга насока. На саемот во Лос Анџелес производителот на спортски машини ќе покаже послаба верзија на суперавтомобилот „Huracan“.
Автомобилот го добил индексот „LP 580-2“. Тој е само со заден пренос и тоа го прави полесен од оригиналната верзија која располага со систем за погон на сите четири тркала. Новата верзија на „Huracan“ е опремена со 5,2-литарски „V10“ мотор, чија моќ е намалена од 610 на 580 КС.
Суперавтомобилот тежи 33 килограми помалку од оригиналот и забрзува од 0 до 100 км/ч за 3,6 секунди или за 0,2 секунди побавно од верзијата со 4х4. Максималната брзина е исто така намалена – од 325 на 318 км/ч.
За модификација со заден пренос се подесени и режимите на работа на агрегат („Strada“, „Sport“ и „Corsa“), променети се поставките на управувањето, како и на системот за стабилизација и контрола на тракцијата. Машината е со променети пружини, амортизери и стабилизатори.
Во промените во изгледот засегнати се предните отвори за воздух, кои помагаат за зголемување на моќта на пристискање. За оваа верзија се нудат 19-инчни тркала кои се специјално создадени за возилото, како и гуми „Pirelli“. Како опција се достапни и 20-инчни бандажи.
Сите овие промени се одразуваат и на цената на возилото. Во Европа „Lamborghini Huracan LP 580-2“ ќе чини 150.000 евра. Тоа е за 19.500 евра помалку од основната верзија на суперавтомобилот со погон на четири тркала.
